Klubi i Devollit ka depozituar një ankesë zyrtare në FSHF kundër ekipit Bylis B, duke pretenduar shkelje të rregullores në ndeshjen e Kategorisë së Dytë që përfundoi në barazim 1-1.
Sipas pretendimeve të klubit ankimues, ballshiotët kanë aktivizuar katër futbollistë të ekipit të parë pa respektuar kohën e detyrueshme prej 24 orësh pushim mes dy ndeshjeve zyrtare.
Konkretisht, futbollistët Ualison, Sanogo, Kane dhe Rabiu janë aktivizuar në orën 13:00, ndërkohë që kishin luajtur vetëm një ditë më parë në sfidën ndaj Elbasanit në orën 16:30.
Devolli argumenton gjithashtu se është shkelur neni që kufizon në 10 numrin maksimal të ndeshjeve që një lojtar i ekipit të parë mund të luajë me ekipin rezervë brenda një sezoni. Ankesa kërkon që rezultati i fushës të anulohet dhe fitorja t’i jepet Devollit në tavolinë me rezultatin 3-0.
Organet juridike të FSHF-së kanë nisur shqyrtimin e dokumentacionit të dorëzuar për të verifikuar këto pretendime. Një vendim përfundimtar pritet të merret nga Komisioni i Disiplinës në mbledhjen e radhës. Kjo situatë mund të penalizojë Bylisin jo vetëm me pikë, por edhe me gjoba financiare.
