Arbër Hoxha po kalon një formë shumë të mirë në kampionatin kroat, ku ditën e djeshme shënoi një tjetër gol dhe dha një asistim brenda pjesës së parë.
Më parë ai kishte spikatur në derbin ndaj Hajdukut dhe ishte protagonist edhe në sfidën kundër Fenerbahçes. Megjithatë, lajmet nga Kroacia sollën shqetësim, pasi Hoxha u detyrua të largohej nga fusha në pjesën e dytë për shkak të një problemi fizik.
Fillimisht u raportua se nuk dihej sesa kohë do të mungonte, në një moment kur Kombëtarja shqiptare përgatitet për ndeshjen kundër Serbisë pas dy javësh. Më vonë u mësua se bëhet fjalë për një problem muskulor jo serioz.
Futbollisti do të qëndrojë dy ditë jashtë stërvitjes për terapi dhe më pas do t’i rikthehet skuadrës. Dëmtimi lidhet me ngarkesën e lartë fizike që ka marrë kohët e fundit, duke luajtur minuta të plota ndryshe nga periudha kur aktivizohej vetëm pjesërisht.
Trajneri i Dinamo Zagrebit, Kovacevic, e ka vlerësuar kontributin e tij, duke theksuar se besimi i dhënë po shpërblehet me paraqitje të mira. Ai u shpreh se është i lumtur me nivelin e lojtarit dhe shpreson të mos ketë pasoja të rënda nga ky dëmtim.
Sipas raportimeve të fundit, Hoxha nuk ka asgjë serioze dhe pritet të rikuperohet shumë shpejt. Ky është një lehtësim për klubin kroat dhe Kombëtaren shqiptare, që llogarit shumë tek ai në ndeshjet e ardhshme.
/Cna
