Trajneri i Lazios, Maurizio Sarri, ka marrë vendimin për të lënë jashtë listës së grumbullimit mbrojtësin e Kombëtares shqiptare, Elseid Hysaj, për sfidën e radhës kundër Torinos.
Sipas raportimeve nga kampi bardhekaltër, shkak për këtë mungesë janë bërë disa probleme fizike që lojtari ka shfaqur së fundmi, duke e bërë të pamundur aktivizimin e tij në këtë përballje të rëndësishme të Serie A.
Ky lajm vjen në një moment mjaft delikat për mbrojtësin shkodran, i cili po kalon një nga sezonet më të vështira në karrierën e tij në Itali.
Edhe pse ky është viti i tij i pestë me fanellën e Lazios, Hysaj ka humbur hierarkinë në formacionin e Sarrit, duke u aktivizuar në vetëm 4 takime përgjatë gjithë këtij edicioni.
Shumë prej ndeshjeve ai i ka ndjekur nga tribuna apo stoli, duke ngritur pikëpyetje mbi të ardhmen e tij në kryeqytetin italian, sidomos tani që dëmtimet po bëhen pengesë për rikthimin e tij në fushë.
Dëmtimi i tij vjen në një moment delikat edhe për Kombëtaren shqiptare, që do të përballet me Poloninë në “play off” të Botërorit.
