Inter ka regjistruar një nga nisjet më të dobëta të sezonit në epokën e tre pikëve për fitore, me vetëm një fitore pas tre javësh dhe dy humbje të pësuara, kundër Udineses dhe Juventusit.
Një start i tillë është parë vetëm në sezonin 2011/12, atëherë kur në stol ishte Gian Piero Gasperini. Humbja në “Allianz Stadium” e ka lënë Interin gjashtë pikë pas Juventusit dhe Napolit, që kryesojnë renditjen me pikë të plota.
Trajneri Chivu është shprehur i qetë për të ardhmen, por ka theksuar se skuadra duhej të menaxhonte më mirë momentet e ndeshjes kundër bardhezinjve. Statistikat nuk janë pozitive: gjashtë gola të pësuar në tre ndeshje, me Sommer të kritikuar për gabimet dhe Akanjin që ende përshtatet.
Mesfusha ka treguar probleme, edhe pse Calhanoglu ka shënuar dy gola. Lautaro Martinez u kthye pa shkëlqimin e zakonshëm pas angazhimeve me Argjentinën.
Në këtë situatë, drejtuesit e Interit kanë ndërhyrë menjëherë. Një takim i posaçëm u zhvillua në qendrën stërvitore në Appiano, ku e gjithë hierarkia e klubit ishte e pranishme, bashkë me trajnerin dhe stafin teknik. Qëllimi i takimit ishte i qartë, skuadra duhet të reagojë menjëherë dhe të gjejë rrugën e rezultateve pozitive. Për Interin, gabimet e tjera nuk lejohen, pasi sezoni është ende në fillim, por diferencat me rivalët kryesorë kanë filluar të krijohen.
