E ardhmja e Ernest Muçit te Trabzonspori pritet të vendoset brenda datës 10 maj, afat ky që klubi ka për të ushtruar të drejtën e blerjes së kartonit nga Besiktas.
Presidenti i klubit, Ertugrul Dogan, ka deklaruar se trajneri ka dhënë miratimin e tij për qëndrimin e sulmuesit shqiptar në skuadër.
Pengesa kryesore aktualisht mbetet vlera financiare, pasi Besiktas kërkon 8.5 milionë euro, ndërsa oferta e fundit e Trabzonsporit ka arritur në 5 milionë euro.
Muçi po kalon sezonin më të mirë në karrierë me 13 gola dhe 8 asiste, duke u kthyer në një element kyç për fazën ofensive. Drejtuesit synojnë të ruajnë boshtin e ekipit për pjesëmarrjen në kompeticionet europiane sezonin e ardhshëm.
Ndërkohë, një situatë ndryshe paraqitet për mesfushorin Kristjan Asllani te Besiktas. Sipas raportimeve, klubi nga Stambolli ka vendosur të mos e blejë kartonin e tij përfundimisht pas përfundimit të huazimit nga Interi.
Mesfushori shqiptar pritet të kthehet në Milano pas kësaj përvoje në kampionatin turk. Performancat e Asllanit nuk kanë mjaftuar për të bindur drejtuesit turq për një investim afatgjatë.
Ky tranzicion do të detyrojë lojtarin të vlerësojë opsione të reja për karrierën e tij gjatë merkatos verore.
