Dinamo ka arritur marrëveshjen e parë në merkaton e janarit duke siguruar shërbimet e sulmuesit liberian, Peter Wilson.
Futbollisti pritet të nënshkruajë një kontratë të vlefshme deri në verën e vitit 2027, për tu vënë menjëherë nën urdhrat e trajnerit Ilir Daja.
Wilson vjen pas një eksperience në kampionatin amerikan me ekipin Oakland Roots, ku shënoi 18 gola në 28 ndeshje gjatë sezonit të kaluar.
Përveç rolit të tij natyral si sulmues qendre, lojtari ka përvojë edhe në krahët e ofensivës, duke i ofruar stafit teknik më shumë alternativa taktike. Gjatë karrierës së tij, ai ka luajtur në kampionate të ndryshme europiane si në Suedi, Poloni dhe Moldavi, ku spikati me ekipin e Sheriff Tiraspol.
28-vjeçari, i cili numëron edhe 16 paraqitje me kombëtaren e Liberisë, do të rrisë konkurrencën në repartin e avancuar të bluve.
