Forma e shkëlqyer te Trabzonspor, ka bërë që disa klube të vihen në gjurmët e Ernest Muçit.
Edhe pse klubi aktual po bën gati shifrat për ta blerë përfundimisht nga Besiktas, lëvizjet e fundit tregojnë se rrugëtimi i tij në Turqi mund të jetë vetëm një urë kalimi drejt Anglisë.
Paraqitjet e fundit të fantazistit shqiptar kanë bërë që skautët britanikë të rezervojnë vendet në tribunë për derbin e kësaj fundjave, i cili mund të shërbejë si stacioni i fundit para një hapi gjigant në karrierën e tij.
Sipas informacioneve që qarkullojnë në mediat turke, dy klube nga Premier League kanë shfaqur interes zyrtar dhe do ta ndjekin live “magjistarin” kuqezi në përballjen direkte ndaj Fenerbahçes.
Kjo sfidë nuk është thjesht një duel për renditjen, por një skenë perfekte ku Muçi mund të vërtetojë se është gati për intensitetin e Premier League. Vetë presidenti i Trabzonspor ka pranuar se në zyrat e klubit kanë mbërritur oferta joshëse për lojtarët në huazim, duke përforcuar idenë se 24-vjeçari është njeriu i momentit.
