Shqipëria ka mbyllur dy ndeshjet e shtatorit dhe do të rikthehet në fushë pas katër javësh kundër Serbisë, një sfidë vendimtare për vendin e dytë dhe shanset për Botërorin.
Serbia fitoi ndaj Andorrës në Leskovc, ndërsa ndeshjet me Anglinë dhe Shqipërinë i kishte planifikuar në Beograd, në “Rajko Mitic”. Megjithatë, ndeshja e humbur 0-5 ndaj Anglisë solli trazira në tribuna, përleshje tifozësh, përdorim lazerash dhe kore kundër Kosovës e shqiptarëve. FIFA po shqyrton dënime të rënda ndaj Serbisë, me mundësinë që sfida kundër Shqipërisë të luhet pa tifozë.
Federata Serbe ka reaguar duke kërkuar ndryshimin e stadiumit për këtë ndeshje. Sekretari Branko Radujko deklaroi se objektivi kryesor është përballja me Shqipërinë, që vendos për playoff-in e Botërorit. Ai theksoi se në Beograd u futën edhe persona të lidhur me ngjarje të dhunshme në Kosovë, çka e bën të pamundur zhvillimin e ndeshjes me tifozë.
Për këtë arsye, është kërkuar që sfida të zhvillohet në Leskovc, një stadium më i vogël dhe më i lehtë për t’u administruar. Radujko shtoi se atje kombëtarja serbe ka marrë gjithmonë mbështetje pa probleme dhe ka regjistruar rezultate pozitive. Vendimi përfundimtar mbetet në pritje të miratimit nga FIFA.
