Tirana po shqyrton mundësinë e afrimit të sulmuesit 27-vjeçar nga Gambia, Dembo Darboe, i cili aktualisht është lojtar i lirë.
Futbollisti është pa angazhim që prej muajit tetor, pas mbylljes së bashkëpunimit me ekipin Al Ahli në Libi. Pengesa kryesore për arritjen e një marrëveshjeje deri më tani raportohet të jenë kërkesat e larta financiare të lojtarit.
Drejtori sportiv i bardhebluve, Omer Bunjaku, ka njohuri të plota për profilin e sulmuesit, nisur nga periudha e tij e suksesshme te Shkupi. Gjatë sezonit 2020/21, Darboe shënoi 16 gola në 18 ndeshje, performancë që u pasua me një tjetër edicion pozitiv te Shakhter Soligorsk.
Megjithatë, pas kësaj periudhe, lojtari ka pësuar një rënie të lehtë në formë dhe në numrin e minutave të luajtura. Aktualisht, emri i tij mbetet ndër më të diskutuarit në merkaton e kryeqytetasve, krahas lëvizjeve të tjera që po planifikon klubi.
