UEFA po shqyrton mundësinë e ndryshimit të sistemit të kualifikueseve për Europianin dhe Botërorin, me synim rritjen e konkurrencës dhe shmangien e ndeshjeve të paracaktuara.
Pas suksesit të formulës së re të Champions League, ideja është që edhe kombëtaret të ndjekin një sistem të ngjashëm.
Një nga opsionet është që 54 ekipet të grumbullohen në një renditje unike me pikë, si në një kampionat të vetëm, ose të ndahen në dy grupe me nga 27 skuadra.
Një tjetër variant është përdorimi i modelit të Ligës së Kombeve, ku skuadrat do të luajnë sipas nivelit të tyre, duke u përballur me kundërshtarë të ngjashëm në forcë. Kjo formulë do të rrisë gjasat që ekipe si Shqipëria dhe Kosova të kenë rrugë më të lehtë drejt kualifikimeve.
Aktualisht, sistemi me grupe shpesh i penalizon këto skuadra, pasi përballen me ekipe shumë më të forta, si Anglia apo Franca. Në sistemin e ri, një rezultat negativ nuk do të kishte ndikim të menjëhershëm në kualifikim. Për më tepër, skuadrat do të kishin më shumë mundësi të rikuperonin pikë në ndeshje të tjera. UEFA pritet të marrë një vendim përfundimtar në muajt e ardhshëm, me synimin që formula e re të nisë nga cikli i ardhshëm kualifikues.
