Mbrojtësi i Kombëtares shqiptare, Marash Kumbulla, pritet të vazhdojë qëndrimin e tij te Mallorca deri në përfundim të sezonit aktual.
Ndonëse gjatë ditëve të fundit u raportua për një interesim nga Udinese dhe Espanyol, eksperti i merkatos Fabrizio Romano ka bërë të ditur se klubi spanjoll nuk planifikon ndërprerjen e huazimit.
Kartoni i 25-vjeçarit zotërohet nga Roma, skuadër ku lojtari nuk bën pjesë në planet teknike për momentin. Gjatë këtij sezoni, Kumbulla është përballur me disa dëmtime që e kanë mbajtur jashtë fushave për shtatë javë.
Pavarësisht interesimit të klubeve të tjera për një huazim të ri, lojtari do të mbyllë sezonin në La Liga. Në fund të sezonit, palët do të rishikojnë mundësinë e blerjes përfundimtare të kartonit nga Mallorca.
