Klubi i Cagliari-t ka nisur lëvizjet në repartin e portës përpara hapjes zyrtare të afatit kalimtar të dimrit. Portieri Boris Radunovic do të largohet nga skuadra sarde për t’u transferuar te Spezia në një kategori më poshtë, me qëllim aktivizimin e rregullt në fushë.
Si rrjedhojë e këtij largimi, Alen Sherri është rikthyer menjëherë te Cagliari pas periudhës së huazimit te Frosinone. Gjatë qëndrimit të tij te Frosinone, portieri shqiptar u aktivizua në vetëm një ndeshje zyrtare, atë kundër Monza-s në Kupën e Italisë.
Nga ana tjetër, Radunovic nuk regjistroi asnjë minutë lojë gjatë pjesës së parë të sezonit me Cagliarin. Këto lëvizje konfirmojnë strategjinë e klubit për të ristrukturuar kontingjentin e lojtarëve si në hyrje, ashtu edhe në dalje. Kjo lëvizje portierësh pritet të zyrtarizohet sapo të nisë periudha e transferimeve në janar.
