Klubet e Interit dhe Besiktasit kanë arritur marrëveshjen për transferimin e mesfushorit shqiptar, Kristjan Asllani, në kampionatin turk.
Sipas detajeve të bëra publike nga gazetari Fabrizio Romano, bëhet fjalë për një huazim me të drejtë blerjeje në përfundim të sezonit.
Skuadra e Besiktas do të marrë përsipër pagesën e plotë të lojtarit për pjesën e mbetur të edicionit futbollistik.
Në rast se klubi nga Stambolli vendos të ushtrojë opsionin e blerjes në qershor, vlera e kartonit llogaritet mes 12 dhe 13 milionë eurove. Asllani pritet të udhëtojë gjatë ditës së sotme drejt Turqisë për të kryer vizitat mjekësore dhe për të nënshkruar kontratën e re.
Ky kalim vjen si një zhvillim i papritur, duke pasur parasysh dëshirën e mëparshme të lojtarit për të qëndruar në Serinë A.
