Vangjel Mile është rikthyer zyrtarisht në klubin e Tiranës, këtë herë jo si trajner i ekipit të parë, por në rolin e drejtorit teknik të akademisë.
Klubi bardheblu e ka zyrtarizuar sot rikthimin e tij në këtë detyrë, të cilën Mile e kishte mbajtur edhe më parë. Gjatë verës dhe në fillim të kampionatit, ai kishte drejtuar ekipin e parë, pa arritur të lërë gjurmë.
Pas këtij ndryshimi, drejtimin e skuadrës së parë e ka marrë trajneri italian Roberto Bordin. Në njoftimin zyrtar, Tirana thekson se Mile do të ketë një rol të rëndësishëm në zhvillimin e akademisë dhe në përgatitjen e talenteve të rinj.
NJOFTIMI I TIRANËS
“KF Tirana Academy njofton rikthimin e z. Vangjel Mile në krye të detyrës si drejtor teknik i akademisë. Mile do të vijojë të kontribuojë në vendim-marrje dhe në zhvillimin e vizionit të madh të klubit, duke rritur talente dhe futbollistë profesionistë. Ai do të jetë gjithmonë aty, i gatshëm për t’i udhëzuar dhe këshilluar drejt suksesit absolut.
Ne nuk bëjmë kompromise me të ardhmen e lojtarëve tanë, prandaj sigurohemi të kemi në organikën tonë vetëm profesionistë.”
