Kombëtarja shqiptare pritet të afrojë një tjetër element cilësor në prapavijë. Stavros Pilos ka marrë vendimin përfundimtar për të përfaqësuar Shqipërinë.
25-vjeçari, i lindur në Rodos, por me rrënjë familjare nga Finiqi i Delvinës, është gati të bëjë debutimin e tij me fanellën kuqezi.
Silvinjo po planifikon ta përfshijë Pilos në listën për sfidën e rëndësishme të “Play-off”-it të Kupës së Botës kundër Polonisë. Mbrojtësi, i cili shquhet për shpejtësinë dhe disiplinën taktike, vjen si një “armë” shtesë për krahun e majtë të mbrojtjes, duke rritur konkurrencën me Mario Mitajn.
Megjithatë, nuk përjashtohet mundësia që lojtari të përshtatet edhe në krahun e djathtë, ku do të sfidonte Elseid Hysajn për një vend në formacion.
Mbetet vetëm zyrtarizimi nga ana e FSHF-së për të kuptuar nëse Pilios do të jetë “surpriza” e listës së radhës për duelin ndaj polakëve.
