Pak ditë më parë “Vetëm Sport” raportoi ekskluzivisht se transmetimi i kampionatit shqiptar në ekranin e RTSH, për sezonin e ri, nuk është i sigurt.
Tashmë janë zbuluar detaje të reja. Burime për “Vetëm Sport”, bëjnë me dije se RTSH nuk ka respektuar plotësisht kontratën e firmosur një vit me parë me FSHF-në.
Bëhet e ditur se pagesat nuk janë kryer sipas asaj që parashikohej në kontratë, duke lënë vend për dyshime, për një heqje të mundshme të të drejtës për transmetim të kampionatit.
Megjithatë gjasat që të ndërpritet kontrata janë të vogla. FSHF dhe RTSH, pritet të arrijnë një marrëveshje, që pagesa e mbetur të shlyhet me këste dhe transmetimi i futbollit shqiptar të mbetet në RTSH.
Ditët e ardhshme do të jenë vendimtare në lidhje me këtë çështje.
Kujtojmë se pas largimit nga Supersport, kampionati ka ndryshuar ekran çdo sezon. Për një edicion ishte në Oversport, me të cilët u ndërpre kontrata për shkak të problemeve financiare.
Më pas kampionati kaloi në ekranin e MCN TV, aty ku zgjati gjithashtu një sezon dhe më pas u ndërpre marrëveshja. Një vit më parë, RTSH, njoftoi blerjen e të drejtave për 3 vite.
/Vetem Sport
