Nuk ka qetësi sa i përket të drejtave të transmetimit në Shqipëri, për Superioren, Kategorinë e Parë dhe Kupën.
Pas largimit nga Supersport, kampionati ka ndryshuar ekran çdo sezon. Për një sezon ishte në Oversport, me të cilët u ndërpre kontrata për shkak të problemeve financiare.
Më pas kampionati kaloi në ekranin e MCN TV, aty ku zgjati gjithashtu një sezon dhe më pas u ndërpre marrëveshja.
Një vit më parë, RTSH, njoftoi blerjen e të drejtave për 3 vite, por “Vetëm Sport” mëson ekskluzivisht se mund të kemi sërish një ndryshim.
Ende nuk ka një konfirmim zyrtar nëse kampionati do të jetë sërish në ekranin e RTSH për sezonin e ri, ndërsa përflitet se mund të ndërpritet sërish kontrata.
Në ditët e ardhshme pritet që situata të jetë më e qartë, ndërsa prej ditësh kanë nisur transmetimet në FSHF TV, kanal të cilin e gjeni në aplikacionin Klani Im.
