Elbasani triumfoi 2-1 ndaj Flamurtarit, në duelin e javës së 28-të në Superiore. Ndeshja në Vlorë kishte gjithçka brenda, ndërsa në fund festuan miqtë, që ngjiten në krye.
Verdheblutë e nisën ndeshjen shumë mirë, duke gjetur avantazhin pas 5 minutave lojë, me Xhonatan Lajthia, i cili shënoi me kokë.
Pjesa e parë u mbyll me këtë rezultat, pavarësisht rasteve të shumta. Fraksioni i dytë nisi i zjarrtë. Flamurtari fitoi penallti, për prekje me dorë në minutën e 53-të.
SHIKONI VIDEOT:
Ekzekutimin e mori përsipër Herald Marku, i cili në tentativën e parë u ndal nga portieri Janaçek. Arbitri vendosi përsëritjen e penalltisë, për parregullsi në zonë, por portieri mik bëri sërish heroin, duke ndalur penalltinë për herë të dytë.
Vetëm nëntë minuta më vonë, Lajthia dyfishoi shifrat për Elbasanin. Reagimi i vendasve ishte i menjëhershëm, duke shënuar me Ramanin në minutën e 65-të.
Portieri Janaçek u largua me ambulancë nga stadiumi, për shkak të një dëmtimi në dorë. Ndeshja u pezullua për disa minuta.
Pas rifillimit, rezultati nuk ndryshoi më. Elbasani me këtë fitore, ngjitet në krye të renditjes me 52 pikë, po aq sa edhe Vllaznia e vendit të parë. Flamurtari renditet i fundit me 24 pikë.
