Një influencer australian ka ngritur akuza për tentativë ryshfeti në lidhje me promovimin e Ousmane Dembele për “Topin e Artë 2025”.
Çmimi prestigjioz do të jepet më 22 shtator në Paris dhe këtë vit nuk ka një favorit të qartë, me emra si Dembele, Lamine Yamal, Raphinha dhe Vitinha në garë.
Influenceri Neil Gardner, me mbi 170 mijë ndjekës në platformën X, deklaroi se mori një email nga një kompani anonime komunikimi. Sipas tij, kompania i ofroi pagesë për të mbështetur publikisht kandidaturën e Dembele në rrjetet sociale.
Gardner refuzoi ofertën dhe publikoi emailin, duke hapur debate të shumta. Një pjesë e publikut u tregua mosbesuese ndaj denoncimit, por “The Athletic” raportoi se emaili ishte dërguar nga një 18-vjeçare që punonte në një kompani komunikimi në Indi. Sipas këtij burimi, veprimi i saj ishte i pavarur dhe jo pjesë e një fushate të organizuar.
Në një reagim për mediat, përfaqësuesit e Dembele mohuan çdo lidhje me incidentin. Ata theksuan se nuk kishin dijeni për këtë përpjekje promovimi.
