Ndeshja Norvegji–Izrael, e parashikuar më 11 tetor për kualifikueset e Botërorit 2026, do të ketë një rëndësi të veçantë si brenda dhe jashtë fushe.
Federata Norvegjeze e Futbollit ka vendosur që të gjitha të ardhurat nga biletat të dhurohen për organizatën “Mjekët pa Kufij”, e cila po ofron ndihmë emergjente në Gaza dhe zonat përreth.
Presidentja e Federatës Norvegjeze, Lise Klaveness, theksoi se futbolli nuk mund të qëndrojë indiferent ndaj krizës humanitare, edhe pse ekipi duhet të përballet në fushë me Izraelin.
Iniciativa ka marrë mbështetje edhe nga një grup i madh investimi në Norvegji, i cili dhuroi 3 milionë korona, rreth 260 mijë euro, përtej të ardhurave të ndeshjes.
Shuma do të plotësohet nga donacione të tjera të ngjashme, përfshirë ato të mëparshme për projekte sportive në Gaza. Ky vendim pritet të sjellë mijëra tifozë në stadium dhe të japë një mesazh të qartë solidariteti.
