Sikur të mos mjaftonte niveli i ulët në fushë, sot futbolli shqiptar ka marrë një tjetër goditje të rëndë, këtë herë nga zyrat.
Komisioni i Disiplinës, ka dënuar rëndë kampionen në fuqi, Egnatian. Trajneri Edlir Tetova është pezulluar për gjashtë muaj, ndërsa stafi i tij teknik me nga pesë ndeshje, së bashku me kapitenin Albano Aleksi.
Shkak është bërë tërheqja e ekipit nga fusha, pas një kartoni të kuq të diskutueshëm ndaj Vllaznisë, diçka që më parë është përsëritur dy herë nga Tirana dhe njëherë nga Vora në Superiore.
Më të drejtë, një tifoz na shkruan se me këto vendime, ndikohet direkt gara për titull, e cila dukej e luftuar mes 4 ekipeve.
Megjithatë, nuk përfundon gjithçka këtu. Komisioni i Disiplinës, ka dënuar gjithashtu Flamurtarin, për trazirat në ndeshjen e fundit, duke pezulluar me gjashtë muaj mbrojtësin Skuadrone. Ankesat e tifozëve kanë shpërthyer, pasi nuk ka asnjë dënim për Elbasanin, ndonëse nga pamjet e publikuara, shihet qartë një përplasje mes pjesëtarëve nga të dyja ekipet.
“Komisioni i Disiplinës, dështon edhe njëherë tjetër të vendosë drejtësi, pas skandaleve të mëparshme, kur nuk ka dhënë asnjë dënim për dhunën në ndeshje të caktuara.
Përdorimi i standardeve të dyfishta nga Komisioni i Disiplinës, e ka dërguar futbollin shqiptar në pikën më të dobët të viteve të fundit. Numri i ulët i tifozëve e konfirmon mësë miri këtë”, na shkruan tifozi në ankesën e tij.
Për vendimet absurde me arbitrat do të flasim në një moment tjetër…
