Hallet e Kukësit nuk kanë të sosur në këtë edicion futbollistik. Përveç ecurisë së dobët dhe rrezikut real për të rënë në Kategorinë e Dytë, verilindorët marrin një tjetër goditje të rëndë pikërisht në prag të merkatos dimërore.
FIFA ka vendosur të bllokojë për momentin merkaton e klubit për shkak të një çështjeje të hapur dhe detyrimeve të pashlyera nga e kaluara. Emri i personit që ka fituar procesin në FIFA dhe ka shkaktuar pezullimin e merkatos nuk bëhet i ditur, por drejtuesit duhet të lëvizin shpejt, para se të mendojnë për afrime në janar, ata duhet të zhbllokojnë situatën duke shlyer këtë detyrim.
Edhe gjatë merkatos së verës, Kukësi është përballur me probleme të ngjashme financiare, por atëherë arriti t’i anashkalojë vështirësitë dhe të bëjë disa afrime. Këtë herë, nevoja për përforcime është edhe më e madhe, nëse klubi synon vërtet mbijetesën. Pas dorëheqjes së trajnerit Bledar Devolli, skuadra po drejtohet nga një staf kujdestar, i cili në tre javët e fundit ka marrë një fitore, një barazim dhe një humbje. Sot verilindorët kanë një transfertë tepër të vështirë në Pogradec, ku liqenorët konsiderohen favoritë të qartë.
Diferencat mes dy skuadrave janë të dukshme në këtë fazë të sezonit—nga objektivat, te pozitat në tabelë dhe të gjithë treguesit e tjerë sportivë. Kukësi do të mundohet të menaxhojë edhe dy javët e ardhshme me këtë strukturë, ndërsa më pas pritet të emërohet trajneri i ri që do të udhëheqë pjesën e dytë të sezonit. Aktualisht, verilindorët mbeten një nga kandidatët kryesorë për rënie, një skenar që do të përbënte një goditje të rëndë për një klub që vetëm pak vite më parë fitonte trofe në elitë dhe përfaqësonte Shqipërinë denjësisht në arenën europiane.
