Imoh Ezekiel ishte një nga afrimet më të bujshme në këtë merkato vere. Sulmuesi nigerian, me një CV të jashtëzakonshme, ku në të kaluarën kishte qenë pjesë e elitës së futbollit, belg, spanjoll, turk dhe rumun, u bashkua me skuadrën e Pogradecit, duke u vendosur në qendër të projektit të liqenorëve.
Por së fundmi duket se situata me sulmuesin 32-vjeçar, ka marrë një trajektore të papritur. Edhe pse në 14 ndeshje, Ezekiel arriti të shënonte 7 gola si dhe të jepte dy asiste “Panorama Sport” mëson se nigeriani është përjashtuar nga drejtuesit e Pogradecit. Ende nuk dihet arsyeja e përjashtimit të bomberit nga skuadra, teksa Ezekiel nuk ishte i gatshëm as ndaj Skënderbeut dhe as sot ndaj Kukësit.
Me shumë gjasa bashkëpunimi është ndërprerë dhe nigeriani nuk do të jetë më pjesë e Pogradecit në vazhdim.
Vlen të theksohet fakti se në të kaluarën Ezekiel ka pasur një vlerë kartoni 6 milionë euro sipas “Transfermarkt”, ndërkohë që kartoni i tij tashmë vlen 250 mijë euro.
