Një seri grabitjesh të organizuara në shtëpitë e futbollistëve të Premier League po lidhen me bashkëpunimin mes grupit kriminal të njohur si “Gucci Gang” dhe grupeve të specializuara të grabitësve shqiptarë.
Sipas një artikulli të “The Sun”, grupet ku bëjnë pjesë edhe shqiptarë, identifikojnë objektivat duke monitoruar rrjetet sociale të lojtarëve dhe partnerëve të tyre, ku shfaqen sende të vlefshme dhe detaje të ambientit të shtëpisë.
Më pas organizohen grupe të strukturuara që përfshijnë vjedhës, shoferë të rrugëve të arratisjes dhe persona që analizojnë sigurinë e banesave. Shpesh synohen shtëpitë kur banorët ndodhen brenda, për të përfituar nga sistemet e çaktivizuara të alarmit.
Për hyrjen përdoren shkallë teleskopike dhe depërtimi bëhet nga katet e sipërme, zakonisht drejt dhomave të gjumit ku mbahen objektet me vlerë. Ndër rastet e prekura janë banesat e Jack Grealish, Raheem Sterling, Alexander Isak dhe lojtarëve të tjerë të njohur.
Në rastin e Grealish, grabitësit morën sende me vlerë rreth 1 milion paund, ndërsa u larguan para mbërritjes së policisë. Të dhënat sugjerojnë se sendet e vjedhura transportohen drejt Skocisë ose me traget drejt Irlandës, ku dorëzohen tek rrjeti i “Gucci Gang”.
Më pas ato magazinohen ose rishiten në Irlandë dhe Spanjë, në tregje të krijuara për sende të luksit. Klubet e Premier League kanë forcuar masat e sigurisë me kompani private, njësi të ndërhyrjes së shpejtë, sisteme të avancuara monitorimi dhe dhoma të posaçme mbrojtjeje.
Disa lojtarë kanë investuar edhe në qen roje të trajnuar profesionalisht. Megjithatë, grabitjet kanë vijuar, duke treguar se rrjetet kriminale operojnë në mënyrë të koordinuar dhe të sofistikuar.
