Teuta vazhdon me lëvizje në merkato dimërore. Drejtuesit e klubit durrsak kanë vendosur të largojnë lojtarët që nuk bëjnë pjesë në planet teknike për pjesën e mbetur të sezonit.
Së fundmi, klubi ka njoftuar zyrtarisht mbylljen e bashkëpunimit me sulmuesin Sebastian Gonzalez Zela. Futbollisti peruan ishte transferuar te Teuta gjatë merkatos së verës së kaluar. Gjatë qëndrimit të tij në Durrës, ai u aktivizua në gjithsej 12 ndeshje zyrtare.
Statistikat tregojnë se sulmuesi nuk arriti të shënonte asnjë gol gjatë minutave të luajtura në fushë. Për shkak të mungesës së efikasitetit, lojtari kishte humbur vendin në formacionin bazë, duke qëndruar në stolin e rezervave.
Përmes një komunikate zyrtare, Teuta konfirmoi ndërprerjen e marrëveshjes me mirëkuptim. Klubi e falënderoi lojtarin për kontributin e tij dhe i uroi sukses në angazhimet e radhës.
Ky largim është pjesë e strategjisë së klubit për të rishikuar organikën pas rezultateve të fazës së parë. Aktualisht, Teuta po studion tregun për të gjetur zëvendësues në repartin e sulmit.
