E ardhmja e mbrojtësit Marash Kumbulla mund të pësojë ndryshime gjatë merkatos së janarit. Futbollisti shqiptar aktualisht është pjesë e Mallorcas në La Liga, i huazuar nga klubi i Romës.
Sipas raportimeve të fundit nga mediat italiane, dy skuadra, Udinese në Serie A dhe Espanyol në La Liga, kanë shprehur interes për shërbimet e 26-vjeçarit.
Klubi i Romës, që zotëron kartonin e lojtarit, raportohet se është i hapur për një marrëveshje të re huazimi me qëllim që mbrojtësi të ketë më shumë minuta aktivizimi.
Espanyol synon rikthimin e Kumbullës pas eksperiencës pozitive që ai pati me këtë ekip sezonin e kaluar. Ndërkohë, mundësia e rikthimit në kampionatin italian te Udinese mbetet një opsion konkret për lojtarin.
Ditët e fundit të afatit kalimtar pritet të përcaktojnë destinacionin e ri të mbrojtësit kuqezi.
