Luftëtari ka zyrtarizuar afrimin e mbrojtësit 19-vjeçar, Amdy Diallo, i cili transferohet në Gjirokastër në formë huazimi nga radhët e Partizanit.
Megjithëse fillimisht u raportua se mbrojtësi do të qëndronte te të “kuqtë” për t’u aktivizuar me ekipin B dhe atë U-19, drejtuesit e klubit kryeqytetas vendosën t’ia besojnë lojtarin ekipit gjirokastrit për pjesën e mbetur të sezonit.
Diallo njihet si një mbrojtës qendre me perspektivë, duke qenë një lojtar kyç në strukturat e moshave të Partizanit gjatë fazës së parë.
Luftëtari, i cili garon për mbijetesë në Kategorinë e Parë, synon që përmes këtij afrimi të rrisë stabilitetin dhe sigurinë në repartin defensiv.
Bashkë me Diallo, pjesë e kësaj lëvizjeje drejt Gjirokastrës do të jetë edhe Skander Tahri, siç ishte paralajmëruar më herët.
