Jasmin Celikoviç pritet të jetë afrimi më i fundit i Vllaznisë. Qendërmbrojtësi boshnjak aktualisht ndodhet në Shkodër dhe sipas raportimeve është duke diskutuar detajet e kontratës me klubin.
26-vjeçari është lojtar i lirë që prej gushtit, çka e bën të mundur kalimin e tij edhe jashtë merkatos zyrtare. Vlera e tij në “Transfermarkt” llogaritet rreth 300 mijë euro, duke e renditur si më të vlerësuarin në repartin e mbrojtjes së kuqebluve.
Futbollisti ka qenë së fundmi pjesë e ekipit Koper në Slloveni. Gjatë karrierës së tij ka luajtur në Kroaci, Bosnjë, Sllovaki, Greqi dhe Rusi.
Ai ka përfaqësuar edhe përfaqësuesen U-21 të Bosnjës. Me këtë afrimi, Vllaznia forcon më tej repartin mbrojtës në funksion të objektivit për titullin kampion.
