Trajneri Francesco Moriero është larguar përfundimisht nga drejtimi i Flamurtarit.
Lajmi është konfirmuar nga kapiteni i skuadrës, Lorenc Trashi, pas përfundimit të ndeshjes ku vlonjatët fituan 1-0 ndaj Vllaznisë.
“Për Morieron mund të them që është i larguar përfundimisht nga Flamurtari”, u shpreh Trashi.
Megjithëse klubi nuk ka lëshuar ende një komunikatë zyrtare për ndërprerjen e bashkëpunimit, mungesa e teknikut italian deri më tani ishte arsyetuar me probleme shëndetësore.
Ekipi aktualisht po drejtohet nga zëvendëstrajneri Andi Ribaj, i cili mori frenat e skuadrës që nga përballja me Partizanin.
Nën drejtimin e tij, Flamurtari ka regjistruar një humbje, një barazim ndaj Teutës dhe fitoren e sotme kundër shkodranëve.
Pavarësisht se renditet në vendin e parafundit, fitorja e fundit e afron Flamurtarin me zonën e sigurt, duke qenë vetëm 3 pikë larg vendit të shtatë në klasifikim.
