Napoli përballet me një problem të madh në prag të nisjes së sezonit të ri futbollistik. Sulmuesi belg Romelu Lukaku do të qëndrojë jashtë fushave për një periudhë të gjatë, të paktën katër muaj, pas dëmtimit të pësuar në ndeshjen miqësore kundër Olympiacos. Ekzaminimet e kryera në “Pineta Grande Hospital” kanë zbuluar një lezion të rëndë të muskulit rektus femoris të kofshës së majtë.
Klubi napolitan ka njoftuar se futbollisti ka nisur procesin e rehabilitimit dhe do të kryejë gjithashtu një konsultë kirurgjikale për të përcaktuar hapat e mëtejshëm.
Kjo e vendos trajnerin Antonio Conte në një situatë delikate, pasi Napoli mbetet aktualisht me vetëm një qendërsulmues në dispozicion, Lorenzo Lucca, i ardhur këtë verë nga Udinese. Kjo do të thotë se skuadra do të përballet me fillimin e kampionatit dhe fazën e grupeve të Champions League me një repart ofensiv të kufizuar.
Për këtë arsye, drejtori sportiv Manna dhe stafi teknik kanë nisur kërkimet në merkato për të gjetur një alternativë sa më shpejt.
Ndër opsionet që po shqyrtohen janë Joshua Zirkzee i Manchester United, i cili ka pak hapësira në ekipin anglez dhe mund të transferohet vetëm në formë huazimi, si dhe Aleksandar Mitrovic, aktualisht pjesë e Al-Hilal, por që po kërkon një rikthim në Evropë edhe me një reduktim të ndjeshëm të pagës.
Napoli pritet të marrë vendim në ditët e ardhshme për të forcuar repartin e sulmit dhe për të mos nisur sezonin me mungesa të rëndësishme në një moment ku objektivat janë të qarta, si në kampionat, ashtu edhe në arenën ndërkombëtare.
