Ndeshja kualifikuese e Botërorit mes Serbisë dhe Shqipërisë nuk do të luhet në Beograd, por në Leskovac. Vendimi u bë publik nga UEFA në mesjavë dhe u konfirmua më pas edhe nga federatat përkatëse. Federata e Futbollit të Serbisë ka sqaruar se arsyeja lidhet me sigurinë e ndeshjes. Në komunikatën zyrtare thuhet se rreziku nuk lidhet vetëm me publikun, por edhe me lojtarët dhe aktorët e tjerë të përfshirë.
Sipas tyre, një përballje e tillë kërkon masa të veçanta sigurie për të shmangur incidente. Federata serbe kujtoi ngjarjet e vitit 2014 në Beograd si shembull të pasojave që mund të ndodhin.
“Arsyeja kryesore është e sigurisë. Jo vetëm të publikut, por mbi të gjitha të lojtarëve dhe të gjithë aktorëve të ndeshjes. Një ndeshje e tillë sjell shkallën më të lartë të rrezikut dhe kërkon kontroll të plotë në mënyrë që të evitohen incidentet që kemi pasur rastin t’i shohim në ndeshjet dy ekipeve.
Të gjithë i kujtojmë mirë ngjarjet dhe pasojat nga Beogradi në vitin 2014”, shkruan në komunikatën e federatës serbe.
