Champions League/ Shorti vendos Real-Benfica, sfida delikate për Juven dhe Interin
Në Nyon të Zvicrës u hodh shorti për fazën “Play-off” të Champions League. 16 skuadrat që nuk arritën kualifikimin direkt, tashmë kanë mësuar emrat e kundërshtarëve me të cilët do të diskutojnë 8 biletat e fundit për në raundin e 1/8-ave.
Goglat kanë rezervuar një përballje epike mes Benficas dhe Real Madrid. Vetëm pak ditë pas humbjes në Lisbonë në raundin e fundit të ligës, “Los Blancos” do të rikthehen në “Estádio da Luz” për të kërkuar hakmarrjen në një sfidë ku gabimi nuk lejohet.
Ndërkohë, një tjetër çift që spikat është ai mes Monaco-s dhe PSG-së. Një “derbi” francez në skenën më të lartë europiane, që garanton se një nga pretendentët kryesorë do të mbetet jashtë fazës eliminatore që në shkurt.
Interi mund të konsiderohet disi i favorizuar nga ky short, pasi do të përballet me norvegjezët e Bodo/Glimt.
Nga ana tjetër, Juventusi do të ketë një mision tejet të vështirë. Bardhezinjtë do të udhëtojnë drejt Turqisë për t’u ndeshur me Galatasaray-n, në një atmosferë që njihet botërisht si një nga më të vështirat për ekipet mikpritëse.
SHORTI I PLOTË:
Benfica-Real Madrid
Bodo/Glimt-Inter
Monaco-PSG
Qarabag-Neëcastle
Galatasaray-Juventus
Club Brugge-Atletico Madrid
Borussia Dortmund-Atalanta
Olympiacos-Bayer Leverkusen
Sfidat e para të këtij raundi do të luhen më 17 dhe 18 shkurt, ndërsa takimet e kthimit, ku do të vulosen edhe kualifikimet, do të zhvillohen një javë më pas, më 24 dhe 25 shkurt.
