Juventusi ka kërkuar faljen për Pierre Kalulu pas kartonit të kuq të marrë në sfidën ndaj Interit në “San Siro”.
Klubi bardhezi e konsideroi përjashtimin të padrejtë dhe fillimisht paraqiti ankimim për heqjen e pezullimit.
Ankesa u rrëzua nga Gjykata Sportive e Apelit, e cila konfirmoi skualifikimin me një ndeshje. Më pas, drejtuesit iu drejtuan presidentit të Federatës Italiane, Gabriele Gravina, duke kërkuar falje të veçantë për mbrojtësin francez.
Edhe kjo kërkesë u refuzua. Si pasojë, Kalulu do të mungojë në ndeshjen e radhës ndaj Comos në “Allianz Stadium”. Trajneri Luciano Spalletti e cilësoi kërkesën e klubit si një veprim të drejtë.
Ky rast rikthen në vëmendje një precedent të prillit 2023, kur presidenti Gravina ndërhyri personalisht për t’i dhënë falje Romelu Lukakut, atëherë pjesë e Interit, pas një përjashtimi në gjysmëfinalen e Kupës së Italisë kundër Juventusit. Edhe në atë rast, ankimimi fillestar ishte rrëzuar, por falja u dha në mënyrë të jashtëzakonshme.
