Në luftë me kohën, zbulohet kur rikthehet Broja

Sulmuesi i Kombëtares shqiptare, Armando Broja, vijon të mbetet jashtë fushave të blerta për shkak të problemeve fizike, duke munguar në ndeshjet e Burnley-t për më shumë se një muaj.

Klubi anglez nuk ka dhënë deklarata të reja lidhur me gjendjen shëndetësore të 25-vjeçarit, fakt që ka shtuar paqartësinë në prag të ndeshjeve të Kombëtares shqiptare.

Trajneri i Burnley-t, Scott Parker, kishte deklaruar javë më parë se lojtari vuante nga shqetësime fizike, por që prej asaj kohe nuk ka pasur përditësime konkrete për ecurinë e tij.

Sipas të dhënave nga platforma “Transfermarkt”, Armando Broja parashikohet të rikthehet në dispozicion më 16 mars, datë kjo që përkon me ndeshjen e javës së 31-të të Premier League kundër Fulham-it.

Mbetet ende e paqartë nëse trajneri i Kombëtares, Silvinjo, do ta përfshijë sulmuesin në listën e lojtarëve për fazën “Play-Off” të Botërorit, duke marrë parasysh mungesën e gjatë të tij nga aktivitetet zyrtare dhe nevojën për formë fizike optimale.