Klubi i Besëlidhjes ka nisur ndryshimet e para në përbërje menjëherë pas sigurimit të ngjitjes në Kategorinë e Parë.
Për të rritur nivelin e skuadrës për sezonin e ri, drejtuesit lezhjanë kanë vendosur të largojnë një numër të konsiderueshëm emrash nga sezoni i kaluar.
Përmes një njoftimi zyrtar, klubi konfirmoi ndërprerjen e bashkëpunimit me zv.trajnerin Alket Kruja dhe tetë futbollistë të organikës. Lojtarët që mbyllën aventurën me këtë ekip janë Neziri, Beci, Biba, Danaj, Ramilli, Oduro, Bega dhe Alan Sander.
Drejtuesit i falënderuan ata për kontributin e dhënë në arritjen e titullit kampion të Kategorisë së Dytë. Zyrtarët e skuadrës u uruan atyre suksese në vazhdimësinë e karrierës së tyre profesionale.
Tashmë vëmendja e klubit është përqendruar te zëvendësimi i tyre me afrime të reja gjatë merkatos. Ndryshimet e radhës në organikë priten të zyrtarizohen gjatë ditëve të ardhshme.
