Tirana ka vendosur marrjen e masave për të mbështetur familjen e sulmuesit Freddy Alvarez pas ndarjes nga jeta të vajzës së tij.
Presidenti i klubit bardheblu, Refik Halili, ka konfirmuar se do të mbulojë të gjitha shpenzimet financiare që lidhen me këtë ngjarje tragjike.
Kjo përfshin kostot e transportit të familjes drejt Kosta Rikës, si dhe shpenzimet për ceremoninë mortore. Ky akt solidariteti vjen si një përpjekje për të lehtësuar procedurat logjistike për futbollistin në këtë periudhë të vështirë.
Klubi ka vënë në dispozicion të gjitha burimet e nevojshme për të asistuar lojtarin në detajet e udhëtimit dhe proceset e tjera administrative. Reagimi i drejtuesve pason vendimin e marrë më herët për shtyrjen e ndeshjes ndaj Flamurtarit.
