Partizani do të udhëtojë drejt Elbasanit për ndeshjen e javës së 31-të në Superiore pa trajnerin Oltijon Kërnaja në stol.
Tekniku i të kuqve është ndëshkuar me pezullim pas kartonit të kuq të marrë nga gjyqtari Juxhin Xhaja në sfidën e fundit kundër Vllaznisë.
Kjo transfertë, e cila do të luhet të hënën më 13 prill, vjen në një moment kritik për “Demat”, të cilët nuk kanë regjistruar fitore në tri javët e fundit të kampionatit.
Gjatë kësaj ndeshjeje, vendin e Kërnajës në stolin teknik do ta zërë ndihmësi Real Zhivanaj, i cili e ka ushtruar këtë rol edhe më parë në takimin kundër Teutës. Zhivanaj do të mbështetet nga pjesa tjetër e stafit, përfshirë trajnerin e portierëve, Kushtrim Voka.
Aktualisht, Partizani renditet në vendin e katërt, por rrezikon zonën europiane pasi ndiqet nga Dinamo me vetëm një pikë diferencë.
