Klubi turk Galatasaray ka paraqitur një ofertë zyrtare për sulmuesin e Kombëtares shqiptare, Arbër Hoxha, por Dinamo Zagreb ka vendosur ta refuzojë atë.
Drejtuesit e klubit kroat e konsiderojnë 27-vjeçarin një element kyç të repartit ofensiv dhe nuk planifikojnë largimin e tij gjatë merkatos së janarit.
Hoxha ka treguar stabilitet gjatë fazës së parë, duke shënuar 6 gola dhe dhuruar 3 asistime në 17 paraqitje në kampionat. Edhe pse interesi nga Turqia është konkret, Dinamo Zagreb pritet të shqyrtojë shitjen vetëm në rast të një oferte financiare shumë të lartë.
Përveç Galatasaray-t, në garë për lojtarin ka hyrë edhe klubi anglez Hull City, ndërsa raportohet për një interesim të mundshëm edhe nga Fenerbahçe.
Me një kontratë të vlefshme deri në vitin 2029, klubi kroat ndodhet në pozitë të fortë negociuese për kartonin e lojtarit. Vlera e sulmuesit në treg vlerësohet aktualisht rreth 2.5 milionë euro.
