Mesfushori shqiptar Kristjan Asllani po përballet me vështirësi sa i përket të ardhmes së tij te skuadra e Torinos.
Edhe pse klubi italian e ka nxjerrë jashtë planeve të tij, futbollisti nuk ka pranuar deri tani ofertat që vijnë nga jashtë Serisë A.
Interesim konkret për shërbimet e tij kanë shfaqur Girona në Spanjë dhe Paris FC në Francë, por lojtari ka refuzuar mundësinë e transferimit në këto kampionate. Asllani, i cili iu bashkua Torinos në formë huazimi nga Interi verën e kaluar, synon të qëndrojë në futbollin italian.
Brenda kampionatit fqinj, skuadra si Sassuolo, Cagliari dhe Parma kanë kryer sondazhet e para, por pa nisur bisedime të avancuara. Koha në dispozicion për të gjetur një destinacion të ri po ngushtohet ndjeshëm për mesfushorin kuqezi.
Ditët e fundit të merkatos do të jenë përcaktuese për të mësuar ekipin e ri ku ai do të aktivizohet. Aktualisht, nuk ka asnjë marrëveshje zyrtare që mund të zgjidhë ngërçin mes lojtarit dhe klubit aktual.
