Klubi i Partizanit është kthyer sot përsëri në stërvitje, pas tre ditëve pushim që u ishin dhënë lojtarëve pas debit të kryeqytetit që shkaktoi tronditje në klubin e kuq.
Kthimi në stërvitje ishte me ndryshime të mëdha, pasi tashmë në stolin e ekipit nuk është më trajneri Mlladen Milinkoviç, i shkarkuar nga detyra, dhe as drejtori sportiv, Arbër Abilaliaj, i cili ka dhënë dorëheqjen.
Ekipi i është besuar trajnerit të Partizanit B, Oltion Kërnaja, i cili ka drejtuar seancën e sotme dhe do të jetë trajneri i parë i skuadrës për një periudhë të pacaktuar, në pritje të riorganizimit të stafit teknik të të kuqve.
“Ekipi ka rinisur përgatitjet stërvitore në stadiumin “Arena e Demave”. Nga sot, drejtimin e ekipit e ka marrë trajneri Oltijon Kërnaja. Grupi nuk është i plotë, pasi prezent nuk janë lojtarët e impenjuar me ekipet tona përfaqësuese. Sfida e radhës për të kuqtë do të jetë transferta e Vlorës ndaj Flamurtarit!”, shkruhej në njoftimin në rrjetet sociale të Partizanit për emërimin e Kërnajës në këtë post.
