Shorti i Ligës së Konferencës ka përcaktuar që skuadra e Dinamos do të përballet me Astanën në kuadër të turit të parë eliminator të këtij kompeticioni.
Së fundmi, në mediat e Kazakistanit ishte aluduar për një përjashtim të mundshëm të këtij klubi nga aktivitetet europiane për shkak të krizës financiare dhe largimit të lojtarëve kryesorë.
Megjithatë, UEFA ka publikuar vendimin zyrtar pas monitorimit të bilanceve të skuadrës kazake për tri sezonet e fundit. Për shkak të parregullsive dhe detyrimeve të prapambetura, klubi i Astanës është ndëshkuar vetëm me një gjobë prej 100 mijë eurosh.
Ky vendim konfirmon pjesëmarrjen e tyre në turne dhe shuan dilemat nëse takimet me kryeqytetasit do të zhvilloheshin. Përfaqësuesit e Astanës kanë sqaruar se procesi i monitorimit nuk rrezikon aktivitetin e tyre sportiv në fushë.
