Inter u rikthye te fitorja dhe në zonën e katërshes më të mirë të Serisë A, pas triumfit bindës 3-0 ndaj Fiorentinës në “San Siro”. Një sukses që shënon fitoren e tretë radhazi në shtëpi ndaj skuadrës vjollcë, e cila mbetet ende pa fitore në kampionat.
Rastet e para erdhën pas gjysmë ore lojë, kur portieri David De Gea u detyrua të ndërhynte në dy momente vendimtare, fillimisht ndaj Bastonit që depërtoi nga qendra, e më pas ndaj Dimarkos që u ndal në mënyrë të shkëlqyer nga gardiani spanjoll. Nga ana tjetër, Fiorentina u shfaq e pafuqishme në fazën ofensive, me një tentativë të vetme të Moise Ken, e neutralizuar lehtësisht nga Somer.
Në pjesën e dytë, dominimi i zikaltërve u bë edhe më i dukshëm. Damfris dhe Bisek provuan të zhbllokonin rezultatin, por De Gea tregoi formë të shkëlqyer, duke mbajtur portën të paprekur deri në minutën e 60-të. Megjithatë, as ai nuk mundi të ndalonte gjuajtjen e fuqishme të Hakan Çalhanoglu, që me një goditje nga distanca e dërgoi topin në cepin e portës për golin e parë të ndeshjes.
Pas avantazhit, Inter kontrolloi plotësisht lojën. Petar Suçiç dyfishoi rezultatin pas një aksioni individual mbresëlënës, duke kaluar mes mbrojtësve kundërshtarë, për të gjetur cepin e afërt të portës. Në minutat e fundit, çdo shpresë e Fiorentinës u shua përfundimisht, kur Viti shkaktoi penallti ndaj Bonit dhe u ndëshkua me kartonin e dytë të verdhë. Çalhanoglu ishte sërish i saktë nga pika e bardhë, duke vulosur shifrat 3-0 për Interin.
Fiorentina e Stefano Piolit regjistron fillimin më të dobët në historinë e saj të Serisë A, duke rritur ndjeshëm presionin mbi skuadrën dhe stafin teknik.
