Beogradi po përballet me një tjetër valë dhune të shkaktuar nga ultrasit e futbollit.
Pas incidenteve që ndodhën fundjavën e kaluar në ndeshjen mes Partizanit dhe Vojvodinës, një tjetër përleshje ka ndodhur pranë stadiumit të Partizanit, ku dy grupe tifozësh rivalë u përplasën fizikisht.
Sipas mediave serbe, tifozët e Crvena Zvezdës sulmuan ata të Partizanit, duke përdorur flakadanë dhe sende piroteknike, nga të cilat mbetën disa persona të plagosur, mes tyre një i ri me djegie të rënda.
Ngjarjet e fundit tregojnë një përshkallëzim të dhunës mes grupeve rivale, vetëm pak ditë para ndeshjes Serbi-Shqipëri në Leskovac, e cilësuar si përballje me rrezik të lartë sigurie.
Më herët, disa tifozë të Partizanit kishin hyrë në stadium dhe kishin dëmtuar fushën, duke shtuar shqetësimet për situatën e tensionuar në futbollin serb.
/Cna
