Marrëdhënia mes sulmuesit anësor Lirim Kastrati dhe klubit të Vllaznisë ka hyrë në një fazë tensioni për shkak të vonesave në shlyerjen e detyrimeve financiare.
Sipas “Panorama Sport”, futbollistit i ishte premtuar likuidimi i pagave të prapambetura në fillim të muajit qershor, gjë që nuk është realizuar ende.
Kjo situatë ka shtyrë lojtarin të kërkojë sqarime dhe të paralajmërojë ndjekjen e rrugëve ligjore nëse nuk gjendet një zgjidhje e shpejtë. Atmosfera në kampin shkodran është rënduar edhe më shumë pas afrimit të sulmuesit Patrik Bardhi, i cili raportohet se ka përfituar një pagesë të menjëhershme në momentin e firmës.
Ky detaj ka shkaktuar pakënaqësi te lojtarët aktualë që presin pagat, ku Kastrati ka qenë një nga zërat më kritikë, duke bërë që e ardhmja e tij te kuqeblutë të jetë seriozisht në dyshim.
