Shqipëria është gjithnjë e më afër fazës “Play-Off” të Kupës së Botës 2026 pas fitores 1-0 ndaj Serbisë, që e ngjiti në vendin e dytë të Grupit K me 11 pikë.
Kuqezinjtë kanë tashmë 4 pikë më shumë se Serbia dhe dy ndeshje të mbetura për t’u zhvilluar në muajin nëntor. Rezultati në Leskovac ka forcuar pozitat e skuadrës së Silvinjos në garën për një vend në fazën “Play-Off”, ku do të marrin pjesë 16 ekipe.
Skuadrat do të ndahen në katër vazo sipas renditjes së FIFA-s të muajit nëntor. Në vazon e parë janë Belgjika, Italia, Turqia dhe Ukraina dhe do të përballen me skuadrat e vazos së katërt, ku ndodhen Uellsi, Rumania, Irlanda e Veriut dhe Moldavia.
Shqipëria aktualisht ndodhet në vazon e tretë bashkë me Hungarinë, Sllovakinë dhe Bosnje-Hercegovinën, ndërsa kundërshtarët e mundshëm vijnë nga vazoja e dytë, ku përfshihen Polonia, Suedia, Republika Çeke dhe Skocia. Gjysmëfinalet dhe finalet e “Play-Off”-it do të zhvillohen më 26 dhe 31 mars të vitit 2026.
