E ardhmja e trajnerit Ilir Daja te Dinamo duket e vendosur edhe për vitet e ardhshme. Kjo është konfirmuar nga vetë presidenti Ardian Bardhi.
Ky i fundit u shpreh se Daja ka kontratë 30-vjeçare dhe me batutë shtoi se nuk do rrijë t’ia rinovojë vit për vit.
“Ishte një vit shumë i bukur. Që nga ardhja e Dajës i prisnim këto surpriza. Ardhja e Dajës për mua është bërë merkatoja. Ne i ndajmë mendimet kur nuk jemi direkt në TV. Tekniku Daja është shprehur që duhet gjetur sulmuesi i duhur.
Nuk është e lehtë që të gjesh një sulmues në janar. Janari nuk sjell prurje të mira, por ne do të kërkojmë. Para 5 viteve kur unë mora Dinamon, nuk ka pasur një akademi. Ne kemi ndërtuar një akademi të mirë gjatë rrugës. Me investimet që jemi duke bërë në terrene dhe infrastrukturë, mendojmë që ta çojmë përpara. Mendoj që jemi në rrugën e duhur.
Rinovimi i kontratës? Nuk do rri vit për vit që t’i rinovoj kontratën. Daja ka kontratë 30-vjeçare, ai do plaket me mua. Klauzolë nëse largohet? Po. Do më marri me vete”, theksoi Bardhi.
