Klubi i Teutës ka dalë me një deklaratë zyrtare për të sqaruar situatën e sulmuesit Joel Duku. Sipas njoftimit, lojtari 22-vjeçar ka kaluar me sukses të gjitha testet mjekësore dhe ndodhet në gjendje të mirë shëndetësore.
Në komunikatë thuhet se futbollisti ka pasur më parë një shqetësim në zemër, për të cilin është operuar me sukses. Mjekët kanë kryer ekzaminime të detajuara dhe kanë dhënë garanci se ai mund të vazhdojë aktivitetin sportiv pa rrezik.
Klubi thekson se çdo procedurë është ndjekur në përputhje me rregullat dhe standardet mjekësore.
REAGIMI
Klubi i Futbollit Teuta dëshiron të informojë opinionin publik në lidhje me transferimin e sulmuesit Lorougnon Joel Doukouo.
Futbollisti 22-vjeçar ka kaluar me sukses të gjitha testet mjekësore dhe gëzon shëndet të plotë.
Joel ka pasur më herët një shqetësim në zemër, për të cilin i është nënshtruar me sukses një ndërhyrjeje kirurgjikale.
Pas ekzaminimeve të detajuara, mjekët specialistë kanë dhënë garanci të plota se ai mund të ushtrojë aktivitetin sportiv pa asnjë pengesë.
Gjithashtu, Komisioni i Mjekësisë Sportive pranë Federatës Shqiptare të Futbollit ka dhënë dritën jeshile, duke konfirmuar se Joel Doukouo nga Bregu i Fildishtë është plotësisht i aftë për të luajtur futboll në mënyrë të rregullt.
Klubi ynë i uron mirëseardhje Lorougnon Joel Doukouo dhe shumë suksese me fanellën blu.
