Trajneri i Kosovës, Franco Foda, ka shpallur listën e futbollistëve për dy ndeshjet kualifikuese të Botërorit, ndaj Sllovenisë dhe Suedisë.
Rikthehen Edon Zhegrova dhe Milot Rashica, të cilët kishin munguar për arsye fizike. Për herë të parë është grumbulluar mbrojtësi Albian Hajdari, që ka zgjedhur Kosovën në vend të Zvicrës.
Në listë janë edhe lojtarët me përvojë si Vedat Muriqi, Valon Berisha, Fidan Aliti dhe Mërgim Vojvoda. Kapiteni Amir Rrahmani mungon për shkak dëmtimi, ndërsa jashtë ka mbetur edhe Bersant Celina, pavarësisht formës së shkëlqyer që po kalon.
Dardanët do të nisin grumbullimin më 6 tetor në Hajvali. Më 10 tetor do të përballen me Slloveninë në Prishtinë, ndërsa më 13 tetor ndaj Suedisë në Goteborg. Pas dy ndeshjeve të para, Kosova është e dyta në Grupin B me 3 pikë, pas Zvicrës që ka 6.
/Cna
