Sevilla mund të hyjë shumë shpejt në një epokë të re drejtuese, pasi Sergio Ramos dhe grupi i investitorëve që ai përfaqëson kanë arritur një marrëveshje për blerjen e shumicës së aksioneve të klubit spanjoll. Operacioni po konsiderohet si një nga zhvillimet më të rëndësishme për klubin andaluzian në vitet e fundit, në një periudhë ku skuadra po përballet me vështirësi sportive dhe financiare.
Sipas raportimeve nga Spanja, të hënën janë zhvilluar takime të gjata në zyrat e klubit, ku grupi i drejtuar nga Ramos dhe fondi “Five Eleven Capital” kanë bindur aksionerët aktualë për garancitë financiare të marrëveshjes. Tashmë pritet vetëm firmosja e kontratave dhe miratimi përfundimtar nga Gjykata e Lartë Sportive.
Bisedimet mes palëve kishin nisur prej muajsh. Në janar, Ramos dhe partnerët e tij kishin firmosur një deklaratë paraprake për blerjen e shumicës së aksioneve të Sevillas, ndërsa më pas janë zhvilluar negociata të detajuara për vlerën ekonomike të operacionit dhe analizimin e situatës financiare të klubit.
Operacioni i plotë pritet të arrijë vlerën e rreth 450 milionë eurove. Një pjesë e rëndësishme e projektit parashikon edhe një investim të menjëhershëm prej 80 deri në 100 milionë eurosh, me synimin për të lehtësuar situatën ekonomike të klubit, për të përmirësuar limitin e pagave dhe për të krijuar më shumë hapësira për afrime të reja në merkato.
Ndryshimi i pronësisë shihet si një mundësi për të nisur një cikël të ri te Sevilla, skuadër që në katër sezonet e fundit ka humbur gradualisht stabilitetin sportiv dhe financiar që e karakterizonte në periudhën e sukseseve europiane. Në stadium nuk kanë munguar protestat e tifozëve ndaj drejtuesve aktualë, të cilët janë akuzuar shpesh për menaxhim të dobët ekonomik dhe rezultate zhgënjyese.
Një nga skenarët që po diskutohet në Spanjë është edhe mundësia që Ramos të marrë postin e presidentit të klubit. Nëse kjo ndodh, familja Del Nido do të largohej nga drejtimi i Sevillas për herë të parë në shekullin e 21-të.
Ramos ka një histori të veçantë me Sevillan. Ish-mbrojtësi u rikthye te klubi si futbollist dy sezone më parë, mes reagimeve të ndryshme nga tifozët për shkak të së kaluarës së tij te Real Madridi. Megjithatë, përfshirja e tij në projektin e ri financiar dhe drejtues mund të ndryshojë perceptimin e një pjese të tifozërisë, sidomos nëse klubi arrin të rikthehet konkurrues në La Liga dhe në Europë.
Me tre ndeshje të mbetura deri në fund të sezonit aktual, Sevilla po punon paralelisht për të siguruar stabilitetin sportiv dhe për të finalizuar ndryshimin e madh në strukturën drejtuese.
