Kombëtarja U-19 është eliminuar sërish në turin e parë të kualifikueseve të Europianit, duke vijuar një ecuri të përsëritur negative. Për këtë ekip, ky rezultat konsiderohet tashmë si një vazhdimësi e zakonshme, pasi prej vitesh nuk ka arritur të shfaqë përmirësime të dukshme.
Shqipëria U19 ka dështuar të kalojë turin e parë në 17 edicionet e fundit ku ka marrë pjesë. Kjo ka ndodhur pavarësisht pranisë së lojtarëve cilësorë nëpër breza dhe afrimit të trajnerëve me eksperiencë në pankinë.
Breza të tërë lojtarësh, përfshirë edhe futbollistë që sot militojnë në Kombëtaren A dhe kanë luajtur në Europian, nuk kanë arritur të ndryshojnë këtë trend.
Për herë të fundit, Shqipëria kaloi turin në vitin 2007, pas rezultateve pozitive kundër Serbisë dhe Lihtenshtejnit. Në turin Elitë u përball me Gjermaninë, Kroacinë dhe Sllovakinë, duke regjistruar një barazim dhe dy humbje.
Në atë edicion luajtën futbollistë që sot nuk janë më aktivë ose janë drejt fundit të karrierës.
Pas vitit 2007, drejtimi i skuadrës ka kaluar në shumë duar, nga Gega te Strakosha, Lala, Bellaj, Bogdani, Dede, Cungu, Bulku dhe Ahmataj. Megjithatë, rezultatet kanë mbetur të njëjta, me statistika që përmbledhin 0 kualifikime, 6 fitore, 6 barazime dhe 38 humbje.
Për këtë arsye, në shortet e UEFA-s, Shqipëria renditet rregullisht mes ekipeve me koeficientet më të ulëta në Europë.
